இனி எல்லாம் இப்படித்தான் - பதிவர்களின் பாட்டுக்கு பாட்டு.

புதிவர் சந்திப்பு இலங்கையில் இடம்பெறவுள்ளதால் “சீசன்” பதிவுகளாக பதிவர்கள் மத்தியில் பதிவர்களையே பாத்திரங்களாக்கி நகைச்சுவைப்பதிவுகள் அரங்கேறிவருகின்றது.

இனி எல்லாம் அப்படித்தான்…

அந்தவகையில் நாமும் கோதாவில குதித்தாகணுமே..

இதோ இலங்கை வலைப்பதிவர்கள் சந்திப்பு இனிய முறையில் ஆரம்பித்து, இதோ இடைவேளை இன்னிசை என்ற நிகழ்வு, திடீர் என பதிவர்களால் மாற்றம்பெற்று,

புதிவர்களின் பாட்டுக்குப்பாட்டு என்று பெயரிட்டு ஒரு போட்டி நிகழ்ச்சியாக இடம்பெறுகின்றது.

இதோ மேடையில் லோஷன் மைக்குடன் ஏறுகின்றார்.

பதிவர்களின் பாட்டுக்கு பாட்டு… வலைப்பரப்பெங்கும் தமிழ் பரப்பி, தமிழுக்கு சிகரம்வைத்து, ஏராளமான மனங்களை வென்ற பதிவர்கள் சார்பில் இடம்பெறும் வேடிக்கை வினோத நிகழ்வு!

இந்த இனியவேளையில், மண்டபத்தினுள்ளே இயற்கையே குளிர்மையை கொலுவீற்றிருக்க செய்துள்ள இந்த இனியநேரத்தில், இந்த போட்டியை ஆரம்பித்து வைக்கின்றேன்.

இதோ முதலாவது போட்டியாளராக….

பேசிக்கொண்டிருக்கும்போதே கிறு கிறு என்று மேடையில் ஏறி லோஷனிடம் மைக்கை பறிக்கின்றார் மதிசுதா..

“அண்ணை எனக்குத்தான் சுடுசோறு” . சரி என்றதன் பின் மைக் லோஷனிடம் கொடுக்கப்படுகின்றது.

சரி..முதலாவது போட்டியாளராக தானே வந்துள்ளார் மதிசுதா..

அவருடன் போட்டியிட்டுப்பாட நாம் அழைப்பது கஞ்சுபாய்.. சீ..பழக்கதோசம் விடுகுதில்லை கூல்போய்.

சரி மதிசுதா..பாடுங்கள் உங்கள் அபிமானப்பாடலை!

வேண்டாம் அண்ணை அதுதான் சுடுசோறுவாங்கிட்டேனே, பாவம் கூல்போயே பாடட்டும்.

சரி கூல்.. பாடுங்கள் உங்கள் அபிமானப்பாடலை…

மொபைலா? மோபைலா? நீ என்ன பிரீப்பேடா, போஸ்பெய்டா சொல் சொல்…

என கூல்போய் சுதாவைப்பார்த்து கண்ணடித்துக்கொண்டே பாடுகின்றார்.

நல்லது கூல்போய்.. அருமையான ஒரு போன் பாடல். ஆனால் உங்கள் தொலைபேசி இலக்கம்தான், போஸ்பெய்டா, பிரீப்பெய்டா தெரியவில்லை. சுதாவை முந்திக்கொண்டுபோய் கொமன்ஸ் போட்;டுவிடலாம். ஆனால் உங்களை மொபைல்ல பிடிப்பதுதானே பெரும்பாடு.. இதோ சுதா “மொ” என்ற எழுத்தில் மணி ஒலித்தது நீங்கள் பாடவேண்டிய எழுத்து “மொ” என்றார் லோஷன்.

கொய்யாலே.. “மொ” என்ற மொக்கு எழுத்தில் மணியை அடிக்கவிட்ட சிதறல்கள் ரமேசுக்கு என் கண்டனங்கள். என்றாலும் விடமாட்டான் இந்த மதி.சுதா..

இதோ என் இசையிலும் நனையுங்கள்..

மொத்திவைத்த மல்லிகை மொட்டு! பூத்திருக்கு வெக்கத்தைவிட்டு…

இல்லை..இலை;லை..சுதா நீங்கள் பாடலையே மாற்றிவிட்டீர்கள். அது பொத்திவைத்த மல்லிகைமொட்டு. எனவே இந்த போட்டியில் இருந்து நீங்கள் நீக்கப்படுகின்றீர்கள்.

மைக்கை கொஞ்சம் பொத்திக்கொண்டே.. என்னசுதா..உங்களுக்கே தெரியும்தானே! என்கின்றார் லோஷன். இல்லை இந்தப்போட்டியில் வெல்பவருக்கு இலட்சரூபா பரிசு என்று யாரோ அதுக்குள்ள ஒரு பதிவு போட்டிருக்கின்றாங்கள் அதுதான்…

சிதறல்கள் ரமேஸை ஒரு பார்வை பார்த்துக்கொண்டே மேடையில் இருந்து இறங்கி தனது இருக்கையில் வந்து இருக்கின்றார் சுதா.

அடுத்த போட்டியாளராக நாம் இங்கே அழைப்பது காதல் உணர்வு கொப்பளிக்க, மோகன மயக்கத்தில் இருக்கும் சக பதிவர் மருதமூரான்.

மருதமூரான் பாடுங்கள் உங்கள் அபிமானப்பாடலை…

ஒரு சிரிப்புடன் மைக்கை வாங்கும் மருதமூரான்..

“என்காதல் சரியா தவறா? பீல் மை லவ்!!!”

அருமை அருமை..ஸ்ருதி பிசகாமல் அனுபவித்துப்பாடினீர்கள். உங்கள் காதலை காதலி மட்டும் இன்றி உங்கள் நண்பர்களும் உணரவேண்டும் என்ற உங்கள் எண்ணத்தை பல தடவைகள் கவனித்து இருக்கின்றேன். தேனீர்க்கோப்பைக்குக்கூட அதிக முத்தம் கொடுப்பரல்லவா நீங்கள்..!

மருதமூரானின் உணர்வோட்டமான பாடலில் ஈர்க்கப்பட்ட ரமேஸ் மணியை ஒலிக்கவிட மறந்துவிட்டதால், கூல்போய் நீங்கள் பாடவேண்டிய எழுத்து “கூ”

கூக்கூ என்று குயில் கூவாதோ…கூக்கூ என்று குயில் கூவாதோ…கூக்கூ என்று குயில் கூவாதோ…கூக்கூ என்று குயில் கூவாதோ…கூக்கூ என்று குயில் கூவாதோ…

அப்பா இப்படியே 47 தடவைகள் குயில் கூவாதோ என்று மட்டும் பாடிவிட்டீர்கள். அங்காலே போவதாக இல்லை. வசனங்கள் மறந்துபோச்சுபோல! எனவே…என்று லோஷன் சொல்வதற்கு முதலே.. சிரிப்புடன், லோஷனை ஒரு நன்றிப்பார்வை பார்த்துவிட்டு, தன் மொபைலை கிண்டிக்கொண்டே இறங்குகின்றார் கூல்போய்..

அடுத்து மேடையில்..நாம் அழைப்பது.. சுபாங்கன்..

வாருங்கள் சுபாங்கன்…

என்ன அபிமானப்பாடலை பாடவேண்டுமா? சரி பாடுறன்.

“குன்றத்திலை குமரனுக்கு கொண்டாட்டம்”

“கொ” என்ற இடத்தில் ரமேஸ் மணியை ஒலிக்கவிட்டார் எனவே என லோஷன் இழுக்கும்போதே.

வெரி சொறி பொஸ். இவ்வளவு நாளாக நான் மியூசிக்கை மட்டும்தான் இரசித்தேன். ஆனால் இந்த இரும்பிலே ஒரு இருதயம் முளைத்தபின்னர்தான் வசனங்களை இரசிக்கதொடங்கினேன். எனவே இந்தப்போட்டியில் இருந்து விடைபெறுகின்றேன் என்றார் மருதமூரான்.

நல்லது அடுத்து நாம் அழைப்பது பதிவர் கோபி. வாருங்கள் கோபி.

கோபி இருந்த இடத்தில் இருந்து முகத்தை பின்பக்கம் திருப்பிக்கொண்டு விழுந்து விழுந்து சிரிக்கின்றார். பின்னால் இருந்து அனுதினன், நிருஜா, ஆதிரைபோன்றோர் கோபியை மேடையை நோக்கி தள்ளுகின்றார்கள்.

அண்ணை நான் இந்த விளையாட்டுக்கு இரசிகன். இறுதியில் வேண்டும் என்றால் இந்தப்போட்டியை அனலைஸ் பண்ணி எழுதிதாறன். நான் வரவில்லை பவனை கூப்பிடுங்கள்.

பவன் மேடைக்கு வாருங்கள் என்கின்றார் லோஷன்.

மேடைக்கு வந்த பவன்… அண்ணே ஸ்கிரீனிலை படத்தை போடுங்கள் அப்பதான் நான் பாடுவேன்.

ஆஹா.. இப்பவே கண்ணை கட்டுதே என்கின்றார் லோஷன்.

அடுத்து பதிவர் நிரூஜா
….

ஆணென்ன பெண்ணென்ன நான் என்ன நீயென்ன எல்லாம் ஓரினம்தான்….

ஓகோ அதுதான் பெண் பெயரில் எழுதுறிங்களோ என்று கேட்டார் சுபாங்கன்.

சுபாங்கனிடமிருந்து மைக்கை பிடுங்கிய லோஷன்..இங்க கொமன்ட் பண்ணுவது நான்தான் போட்டியாளர்கள் பண்ணக்கூடாது. மணி அடிக்கவிட்ட ரமேஸை காணவில்லை. உங்கள் அனைவரினதும் பாடல் இரசனையை கேட்டால் நான்கு நாளுக்கு ரூம்போட்டு அழவேண்டும் போல் உள்ளது.

சரி.. சுபாங்ஸ்.. நீங்கள் பாடுங்கள் “கு”

அப்படி போடுங்கண்ணே…கனநேரமாய் தொண்டைக்குள்ள நிக்குது..

“குழந்தை வாயை முகர்ந்ததுபோன்ற கடும் நாற்றமில்லாத வாயும்வேண்டும்

காமக்கழிவுகள் கழுவும்போதும் கூட நின்றவள் உதவிடவேண்டும்”

ஐயா…அது பாட்டும் இல்லை ஐயா..அதோடு அது முதல் வரிகளும் இல்லை என்று கத்தியே விட்டார் லோஷன்.

விடைபெறுகின்றேன் வணக்கங்கள்.. அடுத்து நாம் அழைப்பது வரோதயன். நிகழ்ச்சியை பார்க்க பின்னால் இருந்ததனால் தெரியாதகாரணத்தால், அங்கே இருந்த கப்பு ஒன்றில் ஏறி நின்று வேடிக்கை பார்த்துக்கொண்டிருந்த வரோ திடுக்கிட்டு கீழே குதித்து…

ஆத்திசூடி..ஆத்திசூடி..யூமே ஆத்திசூடி…என்று பாடியபடி மேடைக்கு வந்து பாடுகின்றார்.

என்ன அதிசயம்…நிரூஜாவும், வரோவும் ஏட்டிக்குப்போட்டியாக அடுத்தடுத்து பாடல்களை அடுக்கினார்கள்.

ஓவ்வொருமுறையும் யாராவது தோற்றுப்போவார்கள் அடுத்தது நான் என்று இருக்கையில் இருந்து எழுந்து எழுந்து அனுதினன் ஏமாந்துபோனதுதான் மிச்சம்.

நல்லது பதிவர்களே இந்த இருவரையுமே வெற்றிபெற்றவர்களாக அறிவித்து இந்த போட்டியை என் பாடல் ஒன்றோடு நிறைவேற்றிக்கொள்கின்றேன். என்றுவிட்டு

“மரி மரிநின்னே முரலிட” என்று கண்களை மூடிக்கொண்டே பாடுகின்றார் லோஷன்.

பாடலின் இறுதியில் உச்ச ஸ்தாயியில் மரிமரிநின்னே..மரிமரிநின்னே….

என்று பாடிவிட்டு மேடையை பார்த்து அதிர்கின்றார் லோஷன்.