Wednesday, November 4, 2009

Operation Smile

நாளாந்தம் எம் பயணங்களில் எதேட்சையாக ஒரு தடவையாவது, பிறவிக்குறைபாடாக இருக்கும் “உதடு அன்னப்பிளவு” உள்ள குழந்தைகளை கடந்துசென்றிருக்கின்றோம். அடடா.. என்ன அழகான குழந்தை, அதன் உதடுகளுக்கு இப்படி நேர்ந்தவிட்டதே என்று எண்ணிக்கொண்டு பயணத்தை தொடர்ந்திருப்போம்.
ஏன்.. இந்த பிறவிக்குறைபாடான உதடு அன்னப்பிளவினால் பாதிக்கப்பட்டவர்களாக எம்முடன் படித்தவர்களோ, அல்லது எமது உறவினர்களோ, நண்பர்களோ ஏன் எமது குடும்ப உறுப்பினர்கள்கூட இருந்திருக்கலாம்.

உதடு அன்னப்பிளவால் பாதிக்கப்படும் சிறுவர்கள், தங்கள் புன்னகைளை மட்டும் தொலைத்துவிடவில்லை. சரளமாகப்பேசுவதற்கு மிகவும் சிரமப்படவேண்டியவர்களாக உள்ளனர். அதேவேளை மற்றவர்களுடன் தன்னை பார்த்து ஒரு வித தாழ்வு மனப்பாண்மை அவர்களுக்குள் குடிகொண்டுவிடுகின்றது. அது தவிர பல விடயங்களிலும் அவர்கள் புறக்கணிப்புகளுக்கு உள்ளாக வேண்டிய நிலை ஏற்படுகின்றது.

சாதாரணமாக வருடம் ஒன்றிற்கு உலகமட்டத்தில் இரண்டு இலட்சம் குழந்தைகள் இந்த பிறவிக்குறைபாடான உதடு அன்னப்பிளவுடன் பிறப்பதாக கணக்கெடுப்புக்கள் கூறுகின்றன. இவர்களில் பெரும்பாலனவர்கள் வசதிகள் குறைந்த நிலையில் உள்ளதன் காரணமாக தங்கள் குழந்தைகளின் உதடு அன்னப்பிளவு சீர் செய்யப்படக்கூடியதொரு குறைபாடுதான், நவீன மருத்துவமுறையினால் அவற்றை நிவர்த்தி செய்துவிடமுடியும் என்ற அறிவு குறைந்தவர்களாகவும். அப்படி அறிந்தாலும் அதற்கான செலவினை செலுத்தி தமது குழந்தைகளுக்கு சிகிற்சைகளை மேற்கொள்ள முடியாதவர்களாகவுமே உள்ளதாகவும் தெரிவிக்கப்பட்டுள்ளது.

இதில் வேதனை தரும் சம்பவங்கள் என்னவென்றால், இவ்வாறான பிறவி உதடு அன்னப்பிளவுடன் பிறக்கும் குழந்தைகளை பெற்றவர்களே ஒதுக்கி நடப்பதும், மூன்றாந்தரப்பிரஜைகளாக சமுகம் அவர்களை பார்ப்பதும்தான் என சமுக சேவகர்கள் வருத்தம் கொண்டுள்ளனர். கல்வி கற்கும் இடம், விளையாட்டு என்ற சிறுவர்களுக்கேயான ஈர்ப்புள்ள இடங்களிலும் இவர்கள் புறக்கணிக்கப்படுவதாக கூறப்படுகின்றது.

இந்த வருட முற்பகுதியில் ஏ.ஆர்.ரஹ்மான் ஒஸ்கார் விருதுபெற்ற ஒஸ்கார் விழாவிலே “ smile pinki” என்ற உதடு அன்னப்பிளவினால் பாதிக்கப்பட்ட ஒரு சிறுமிபற்றிய ஆவணப்படத்திற்கும் விருதுவழங்கப்பட்டிருந்ததை அறிந்திருப்பீர்கள்.
மேற்படி உதடு அன்னப்பிளவு பற்றிய வழிப்புணர்வை ஏற்படுத்த எடுக்கப்பட்ட ஆவணப்படமே “smile pinki” ஆகும்.

பிறவிக்குறைபாடான உதடு அன்னப்பிளவானது பரம்பரை நோயோ, அல்லது கடவுளின் சாபமோ அல்ல. உண்மையில் அது ஒரு மற்றுமுழுதான பிறவிக்குறைபாடே ஆகும். என்றாலும் இன்றைய மருத்துவ நவீன சிகிற்சைகள் மூலம் அதை உடனடியாகவே சீர்ப்படுத்திவிட முடியும் என மருத்துவ அறிக்கைகள் கூறுகின்றன.

இவ்வாறான குழந்தைகளின் உதடுகளில் அழகான புன்னகைகளை கொண்டுவருவதற்காக 1982ஆம் ஆண்டுமுதல் கிட்டத்தட்ட ஐம்பதிற்கும் மேலான நாடுகளில் இயங்கிவரும் அமைப்பே “Operation Smile” ஆகும்.
இதுவரை பல இலட்சம் பிறவி உதடு அன்னப்பிளவுள்ள குழந்தைகளுக்கு சிகிற்சைகளை வழங்கி அவர்களின் அழகிய புன்னகையினை கண்டுள்ளது இந்த அரச சார்பற்ற தொண்டு நிறுவனம்.

தனியே சிகிற்சைகள் மட்டும் இன்றி, இந்த பிறவி உதடு அன்னப்பிளவு பற்றிய வழிப்புணர்வை உலகலாவிய ரீதியில் முன்கொண்டு செல்வதிலும், இதனால் பாதிக்கப்பட்ட சிறுவர்களுக்கான ஒரு காப்பரணாகவும், இது தொடர்பான மருத்துவ முறைகள், கற்கை நெறிகள் என்பவற்றை நடத்தியும் வருகின்றது இந்த அமைப்பு.

முன்னமே சொன்னதுபோல நாம் இவ்வாறான குழந்தைகள் பலரை கண்டு ஏங்கியிருப்போம். எமக்கு அந்த வலி வரும்வரை நாம் அதுபற்றி பார்வையாளராக இருந்துவிடுவதூன் மனித இயல்பாக உள்ள நிலையினை மாற்றி, எம்மால் முடியாவிட்டாலும், இந்தகுழந்தைகளுக்கு உதவும் “Operation Smile “ போன்ற தொண்டர் அமைப்புகளுக்கு எம்மாலான நிதிகளை கொடுத்தாகினும், உலகம் முழுவதிலும், குறைபாடில்லாத குழந்தைகளின் அழகான புன்னகைக்கு வழிவகுக்கலாமல்லவா?

செய்தி.
“Operation Smile” தொண்டு நிறுவனத்தின் 20ஆவது ஆண்டு வழிப்பணர்வை ஏற்படுத்தும் நிகழ்வுகள் இன்று (நவம்பர் 04 முதல் 16ஆம் திகதிவரை) வியட்னாமில் ஆரம்பித்துள்ளது. இந்த நடவடிக்கைகள் மூலம் 3000 வியட்னாமிய பிறவி உதடு அன்னப்பிளவு உள்ள குழந்தைகளுக்கு இலவச சீரமைப்பு சிகிற்சை வழங்கப்படவுள்ளதாகவும் அறிவிக்கப்பட்டுள்ளது.
இதன்பொருட்டு “Operation Smile” அமைப்பின் கௌரவ தூதுவரான பிரபல நடிகர் ஜாக்கி ஷான் நேடியாகவே இன்று வியட்னாமுக்கு விஜயம் செய்து இந்த 20ஆம் ஆண்டு வழிப்புணர்வு ஊட்டும் விழாவில் கலந்துகொண்டுள்ளார்.

Sunday, November 1, 2009

ஞாயிறு ஹொக்ரெயில் (01.11.2009)

அச்சுவலைச் சந்திப்பு

இருக்கிறம் சஞ்சிகை ஒழுங்கு செய்துள்ள ஊடகத்துறையினருக்கும், வலைப்பதிவாளர்களுக்குமான சந்திப்பு ஒன்று நாளை இடம்பெறவுள்ளதாக அறிவிக்கப்பட்டுள்ளது. இந்த மகிழ்ச்சியான செய்தியினை தொடர்ந்து இலங்கை பதிவாளர்கள் அனைவரும் பெரும் உட்சாகத்துடன் காணப்படுவதை அவதானிக்கமுடிகின்றது. இலங்கை பதிவர்களின் முதலாவது சந்திப்பின் பின்னர் இவ்வாறானதொரு ஒழுங்குபடுத்தல் மூலம் பல வலைப்பதிவாளர்களும் ஒன்றுகூட நல்லதொரு சந்தர்ப்பம் கிடைத்துள்ளது.
ஊடகத்துறையினருக்கும், வலைப்பதிவாளர்களுக்கும் இடையில் ஒரு நட்புறவு ஏற்பவது நல்லதொரு விடயமே. இதன்மூலம் வலைப்பதிவாளர்களின் பல வலைப்பதிவுகள் அச்சேற்றம்பெறவும், ஒலிவடிவம் பெறவும் ஏதுவாக இருக்கும்.

பல இலட்சம் மருமக்களின் மாமா

இலங்கை வானொலியில் “வானொலிமாமா” என்ற நிகழ்ச்சியை அறிமுகப்படுத்தி, தனது மென்மையான குழந்தைகளுக்கே உரிய பேச்சுக்களால் பல இலட்சம் குழந்தைகளின் அன்பு மாமாவாக பிரவாகம் எடுத்திருந்த ச.சரவணமுத்து அவர்கள் கடந்த 30ஆம் திகதி வெள்ளிக்கிழமை கொழும்பில் தனது 94ஆவது வயதில் காலமாகியுள்ளார்.
இலங்கை வானொலியின் பிதாமகர்களில் ஒருவராக இவரை கொள்ளமுடியும். நிகழ்ச்சிவழங்கல் மட்டும் இன்றி நாடக நடிப்பு மற்றும் நாடக தயாரிப்புக்களிலும் இவர் ஈடுபாடுடையவராக இருந்ததாக அறியமுடிகின்றது.

இலங்கையர்கோனின் “விதானையார் வீடு” என்ற இலங்கையில் புகழ்பெற்ற நாடகத்தில் பேராசிரியர் சிவத்தம்பி அவர்களுடன் முக்கிமான பாத்திரம் ஒன்றில் இவர் நடித்துள்ளதாக தகவல்கள் உண்டு.
வானொலி மாமா என்ற அடைமொழியுடன் இவர் ஆரம்பித்த அந்த சிறுவர் நிகழ்ச்சி காலம்காலமாக மற்றய அறிவிப்பாளர்களால் இந்தப்பெயருடனே இவரது பாணியிலேயே நடத்தப்பட்டு வந்தது என்பது குறிப்படத்தக்கது.
(படம் - நன்றி கானாபிரபா)

மனிதம் செத்துப்போன நாட்டில்…
கொழும்பில் வெள்ளவத்தை, பம்பலப்பிட்டி ஆகிய இடங்கள் மக்கள் பரவலாகவும், மிகச்செறிவாகவும் வாழும் பகுதிகள் ஆகும், இந்த பகுதிகளில் பெரும்பான்மையாக தமிழர்களே வாழ்ந்துவருகின்றனர்.
கோல்பேஸ் என அழைக்கப்படும் கொழும்பு காலிமுகத்திடல் கடற்கரை தற்போது மூடப்பட்டுள்ளதால், வெள்ளவத்தை, பம்பலப்பிட்டி கடற்கரையில் காதலர்கள் உட்பட இளைஞர்கள், குடும்பத்தினர், சிறுவர்கள் என பலர் கூடுவது வழக்கம்.
இந்த நிலையில் இரண்டு தினங்களுக்கு முன்னர் பம்பலப்பிட்டி கடற்கரை பகுதியில், மனநிலை பாதிக்கப்பட்ட தமிழ் இளைஞன் ஒருவனை சிங்கள இனத்தவர்கள் (ஒரு பொலிஸ் உத்தியோகத்தர் உட்பட) கடலுக்குள் தள்ளி அடித்து கொலை செய்துள்ள சம்பவம் ஒன்றும் அது காட்சியாக பதிவாகியுள்ளதும் எனக்கு நீங்கள் நினைப்பதுபோல அதிர்ச்சியை தரவில்லை. ஏனென்றால் மனிதம் எப்போதோ செத்துப்போன ஒரு நாட்டில இப்படி எல்லாம் நடப்பது ஒன்றும் அதிசயமோ அல்லது புதிதாக ஒரு அதிர்ச்சியையோ தந்துவிடவில்லையே.
என் கோபம் என்னவெனில் பலர் கண்முன்னால் நடந்திருக்கும் இந்த மிருகத்தனத்தை அப்போதே தட்டிக்கேட்டு தடுத்துநிறுத்த ஒரு மனிதாபிமானம் உள்ள மனிதனும் இல்லை என்பதுதான்.

பிடித்த ஒரு கேள்வி – பதில்

ஏன் ஒரு எழுத்தாளனின் படைப்புக்களை சக படைப்பாளிகள் ஒப்புக்கொள்வதில்லை? (எழுத்தாளனுக்கு பதில் பதிவர்கள் என்றும் போடலாம்)

பிரஞ்சு தேசத்தைச்சேர்ந்த எழுத்தாளர் அன்ரே ழீட் தனது படைப்புக்கள் குறித்து இப்படி ஒருமுறை கூறியிருந்தார்.
“பல இலட்சம் பேர்களில் சில ஆயிரம்பேர்கள் ழீட் எழுதியதில் சில நூல்களையாவது படித்திருப்பார்கள். இந்த சில அயிரம்பேர்களில் சில நூறு ஆசாமிகளாவது ழீட் சொல்வதில் ஏதோ ஒரு அர்த்தம் இருக்கின்றது என்று நினைப்பார்கள். அந்த நூறு ஆசாமிகளில் ஒருவர் நிச்சமாக ழீட் சொல்வது சரி என்று எண்ணுவார். அட..அந்த ஒருவர் ழீட் தான்”

அப்படி என்றால் சக எழுத்தாளர்கள்????

Darkness at dawn (குறும்படம்)
போரின் தாக்கத்தினை மெல்லிதான ஒரு உணர்வு ஓட்டத்துடன் ஆர்ப்பாட்டம் இல்லாமல் மெல்லப்புரியவைக்கும் ஒரு இலங்கை குறும்படம்.
கொடிய யுத்தம் உலகம் முழுவதிலும் எத்தனைபேரை ஊனமுற்றவர்களாக்கியிருக்கும்? அதிலும் எத்தனை சிறுவர்களை???

எப்போ வருவாரோ???
நமக்கும் சங்கீதம் என்றால் அலாதிபிரியம். கர்நாடாக சங்கீதத்தில் மொழி தெரியாத உருப்படிகளைவிட செந்தமிழால் இசை மணம்பரப்பிய எம்.எஸ்.சும்பு லட்சுமியின் காற்றினிலே வரும்கீதம், குறை ஒன்றும் இல்லை மறைமூர்த்தி கண்ணா ஆகிய பாடல்களை கட்டு தன்னிலை மறந்த சந்தர்ப்பங்கள் பல உண்டு.
அதேபோல எனக்கு பிடித்த பாடல் “எப்போ வருவாரோ எந்தன் கலி தீர”
என்ற பாடல். ஆனால் இப்போது என்னமோ, அந்தப்பாடலை கேட்டுக்கொண்டே இருப்பேன். கலிதீர்க்க வருவார் என்ற ஒரு நம்பிக்கையுடன்.
செஞ்சுறுட்டி இராகத்தில், ஆதிதாளத்தில் அமைந்த இந்தப்பாடலை கோபலகிருஷ்ண பாரதியார் அவர்கள் இயற்றியிருக்கின்றார்கள்.

ஒரு சர்தாஜி ஜோக்.
சர்தாஜி ஒருநாள் நூலகத்திற்கு சென்றிருந்தார். அங்கே நெப்போலியனின் படமும் போட்டு..”முடியாது என்ற சொல் என் அகராதியில் கிடையாது” என்ற அவரது வசனமும் போடப்பட்டிருந்தது. அதை வாசித்த சர்தாஜி, நெப்போலியனின் படத்தைப்பார்த்து
இப்ப நீங்கள் இதைச்சொல்லி என்ன பிரியோசனம்.? அகராதியை வாங்க முதல் நீங்கள் அதை கண்டிப்பாக சரிபார்த்திருக்கவேண்டும். வாங்கிவிட்டு குறைகூறக்கூடாது என்றார்.

Saturday, October 31, 2009

2012 இன் பயங்கரம்?


2012 இல் உலகம் அழிந்துவிடும், ஒரு ஈ கூட மிஞ்சாது, எல்லாப்பயலுகளும் செத்துப்போகப்போறீங்களடா, அதுவரை ஆடுங்கள் என்று ஆளாளுக்கு அள்ளி விட்டுக்கொண்டிருக்கின்றார்கள். இதல் உண்மை எது, பொய் எது என்று அந்த வருடம்தான் பதிலளிக்கவேண்டும்.
இது தொடர்பாக பல உலக சஞ்சிகைகளும், இணையதளங்களும் தங்கள் பாட்டிற்கு பீதியை கிளப்பிக்கொண்டிக்கின்றார்கள். இதில் உலகில் அனேகமானோர் விஜயம் செய்யும் இணையம் ஒன்று “2012 இல் உலகத்தின் முடிவு” என்ற பெயரில் குறிப்பிட்ட தினம் வரும் தினத்தில் இருந்து ஒவ்வொரு செக்கனாக கவுண்டவுண்வேறு போட்டுக்கொண்டிருக்கின்றது.


இந்த நிலையில் உலகமே உன்னிப்பாக பார்க்கும் ஒருவிடயத்தை ஹாலிவூட் உலகம் சும்மா பார்த்துக்கொண்டிருக்குமா? அனைவரும் எதிர்பார்த்ததுபோலவே 2012 என்ற பெயரில் மிகப்பிரமாண்டமாக உலக முடிவினை காட்ட எடுக்கப்பட்ட படம் எதிர்வரும் நவம்பர் 13ஆம் நாள் வெளியாகவுள்ளது.
இந்த திரைப்படம் பற்றியும் பல இணையங்கள், பல சஞ்சிகைகள், பல வலைப்பதிவுகளில் தகவல்கள் வந்துவிட்டதால், மீண்டும் அதை சொல்லவேண்டிய தேவை இல்லை. இருந்தபோதிலும் நவம்பர் 13ஆம் நாள் உங்களுக்கும் ஆர்வத்தை உருவாக்கவேண்டாமா? அதற்காகத்தான் இந்தப்பதிவு.


அந்த திரைப்படத்தின் ஸ்டில்களை அடுக்கிவிடுகின்றேன். திரையில் அந்தக்காட்சிகளை கண்டிப்பாக பாருங்கள், பார்ப்போம்..
“டே ஆவ்ரர் ருமாறோ” என்ற திரைப்படம் வெளிவந்து அதை பார்த்துவிட்டு, இப்படி எல்லாம் தண்ணீர் வந்து ஊர்மனைகளை அழிக்குமா என்ன? என்று ஏழனம் செய்தவர்கள் எல்லாம் 2004ஆம் ஆண்டு வாயை முடிக்கொண்டோம்; அல்லவா?
எதற்கும் 2012 திரைப்படத்தையும் பார்த்துவைப்போமே..















Friday, October 30, 2009

மெல்லத் தமிழ் இனி...???


இற்றைக்கு ஐயாயிரம் ஆண்டுகளுக்கு முதலில் வெளிவந்தது "தொல்காப்பியம் எனும் தமிழ் நூல்" . தமிழ் மொழியின் சான்றினை நிரூபிப்பதற்கு தமிழர்களின் கையில் கிடைத்துள்ள நூல் அதுவே.
இது ஒரு இலக்கண நூல் என்பதனால் இதற்கு முன்னரே பல தமிழ் இலக்கிய நூல்கள் வெளிவந்திருக்கலாம் என எண்ணத்தோன்றுவதிலும் எந்தவித பிழையோ அல்லது மெருகூட்டலோ இருந்துவிடுவதற்கு இடமில்லை.
இதனால்த்தான் தமிழின் தொன்மை பற்றி எழுதவிளைந்த தமிழர்கள் "மனித இனம் வேட்டையாடித்திரிந்த கற்கால நாகரிகம், மற்றும் அவர்கள் ஆற்றுவெளியினை அடைந்து நிலத்தை அடிப்படையாகக்கொண்டு வாழ முனைந்த (மந்தை மேய்த்தல், விவசாயம்) காலங்களுக்கு முற்பட்ட தொன்மையினை குறிப்பதற்காக "கல்தோன்றா, மண்தோன்றா காலத்தே முன்தோன்றிய மூத்த தமிழ் என கூறிக்கொண்டனர்.

அடுத்துவந்த சங்க கால இலக்கியங்களும், மிக மகோன்னதாமாக உள்ளது. தமிழர்களின் வாழ்க்கை முறைமைகளும், கலை எழுச்சி, ஏனைய துறை அறிவுகள் என்பவை அந்த இலக்கியங்களை படிக்கும்போது எங்களை பிரமிக்க வைக்கின்றது.
ஏனெனில் அன்று வாழ்ந்த தமிழர்கள் உலகலாவிய ரீதியில் சகலகாலா வல்லவர்களாக தமக்கேயான அறத்துடனும், காதலுடனும், நேரம் ஏற்படும்போது வீரத்தை காட்டியும் சீரிய வாழ்க்கை முறை ஒன்றை வாழ்ந்துள்ளனர்.

நிற்க! விடயத்திற்கு வருவோம்…
பழம்பெருமை பேசிச் சாவதே தமிழனின் பழக்கமாகிவிட்ட இந்தக்கால கட்டத்தில் நாங்கள் எங்கள் பழம்பெருமைகளை இத்தோடு விட்டுவிட்டு இன்று எமது மொழிமூலம் தமிழர்களை எப்படி வழர்த்துக்கொள்ளலாம் என்பதை மட்டும் கருத்தில் எடுத்துக்கொள்வோம்.
தமிழை வளர்க்கிறோம் என இன்று பலர் கிளம்பி, தமது வியாபாரத்திற்கு அடைமானமாக தமிழை வைப்பதை இனி எந்த தமிழனும் அனுமதிக்கப்போவதில்லை. அனுமதிக்கவும் மாட்டான் என்பதில் பெரு நம்பிக்கை உண்டு.
சரி! ஆரம்ப காலத்தில் இந்த வேக எழுச்சி ஆரம்பப்பாய்ச்சல் பாய்ந்த எமது தமிழ் மொழியும், தமிழர்களும் நாளடைவில் ஏன் பின்தங்கினர்? அன்னியப்படையெடுப்பு, அடக்குமுறை, மொழிக்கலப்பு என்று தமிழர்களின் குணமாகிய மற்றவனை காரணம் காட்டுவதை விட்டுவிட்டு அந்த பிளையினையும் எங்கள் சீரியத்தமிழர்களுக்கு அடுத்துவந்த தமிழ் பரம்பரையினரே விட்டுள்ளனர் என்பதை ஒத்துக்கொண்டு எமது காலத்தில் மொழிக்கு நாம் என்ன செய்தோம்.. தற்போது எமது மொழி மற்றும் இன முன்னேற்றத்திற்கு ஏதுவான காரணிகள் என்ன? பாதகமான காரணிகள் என்ன என்பதை ஒரு ஆராய்ச்சியினை செய்வோமானால் அது ஆரோக்கியமானதொன்றே.

பல்வேறு பட்ட இனங்களுக்கிடையில் இடம்பெறும் அஞ்சல் ஓட்டமே, உலக ஓட்டம். அவர் அவர்கள், அவரவர்களுக்கான கோடுகளில் ஓடிக்கொண்டிருக்கின்றார்கள். இதில் தமிழன் எங்கே ஓடிக்கொண்டிருக்கின்றான்? எத்தனை தரம் அஞ்சல் கோல்கள் பரிமாற்றப்பட்டுள்ளன?
ஆரம்பத்தில் ஓட்டம் தொடங்கிய உடனேயே தமிழன் ஏனையவர்களைவிட மிக வேகமாக (ஏன் பாய்ச்சலாக என்று சொன்னாலும் தப்பில்லை) மற்றவர்கள் இரண்டு அடி எடுத்து வைப்பதற்கு முன்னரே அடுத்த தலைமுறைக்கு சுற்றிவந்து கோலை கொடுத்துவிட்டான். பின்னர் ஓடிய தமிழர்கள் ஆமை முயல் கதையில் வரும் முயலாக மாறிவிட்டனரோ என்னமோ தெரியவிலை.
இடைக்கிடை தமிழர்களின் வானில் பிரகாச உடுக்களாக பல கவிஞர்கள், புலவர்கள் வரவில்லை என்றும் சொல்லி விடமுடியாது தான். எனினும் அது இலக்கியங்களுடன் மட்டுமே முற்றுப்பெற்றுக்கொண்டது.

தமிழ் சமுதாயத்தின் சமகால நிலை என்ன? தமிழ்ச் சங்கள் பல இன்றும் கம்பராமாயணத்திலும், கந்தபுராணத்திலும் இருந்து முற்றுமுழுதாக இன்னும் வெளிவரமுடியாமல் குண்டுச்சட்டிக்குள்ளேயே குதிரை ஓட்டிக்கொண்டிருக்கின்றனர்.
மற்ற மொழி இலக்கியங்களும், சமுகங்களும் நாங்கள் எட்டிக்கூட பிடிக்கமுடியாத அளவுக்கு சென்று விட்டார்கள்! இப்போது நாம் என்ன செய்வது??????
ஆங்கில மொழி ஆதிக்கம் ஒரு புறம், தமிழ் பேசுவதை தவிர்த்து ஆங்கிலத்தில் பேசுவதை பெருமை என்று நினைக்கும் மேதாவித் தமிழர்கள் ஒருபுறம், இந்த நிலையில் மற்ற மொழிகளின் நிலைக்கு வரமுடியாது தமிழ் ஆமைவேகம் போட்டு "முதுகில் பாரிய சுமைகளுடன்" வந்துகொண்டிருப்பது மறுபுறம்!! இவற்றுக்கெல்லாம் உச்சமாக " மெல்லத் தமிழ் இனிச்சாகும்" என பரிதாப்படும் யோக்கியவான்கள் ஒருபுறம் …. சொல்லுங்கள் இப்போது நாங்கள் என்ன செய்வது??????

நிறைய யோசித்து குழம்பவேண்டாம். இளைஞர்களே … உறுதி மொழி எடுத்துக்கொள்ளுங்கள்.. சுமார் 5000 கால இடைவெளிக்கு பின்னர் தமிழ் அன்னையினை அழகு படுத்த இதோ … இந்தக்காலம் உங்களுக்காக மட்டுமே சிறப்பான ஒரு இடத்தை தந்துவிட்டுள்ளது.
"யூதர்கள் தங்களுக்கு என்று ஒரு நிலம் இல்லாமல் எப்படி உலகெல்லாம் பரந்து சென்று பல பல விடயங்களை அறிந்து அவை முழுவதையுமே எப்படி தங்கள் இன வளர்ச்சிக்காக பின்னரான காலப்பகுதியில் பயன்படுத்திக்கொண்டார்கள் என்பதை ஒரு கணம் சிந்தித்துப்பாருங்கள்.
அதே சந்தர்ப்பம் இன்று " ஈழத்தமிழர்களாகிய" உங்களிடம் மட்டுமே வந்துள்ளது. தாமதிக்கும் ஒவ்வொரு நாளும் எங்கள் இனம் மேலும் ஒரு வருடம் பின்சென்று கொண்டிருக்கின்றது என எண்ணிக்கொள்ளுங்கள்.

இன்று ஈழத்தமிழர்கள் இல்லா நாடு இல்லை என்று சொல்லுமளவுக்கு உலகமெல்லாம் பரந்து வாழ்வது, கூடிழந்து அந்நிய கூடுகளில் கிடைத்துள்ள அடைக்கலம் " எனக் கூறிக்கொண்டாலும், கெட்டதிலும் ஒரு நன்மையினை ஆக்கிக்கொள்ளுங்கள்.
இன்று ஈழத்தவர்களுக்கு மேலைநாட்டு முக்கிய மொழிகளான ஆங்கிலம், பிரன்சு, டொச்மொழி, டனிஸ், ஸ்பனிஸ் என எத்தனையோ மொழிகள் எழுதவும் படிக்கவும் தெரியும் என்ற நிலை வந்துவிட்டது.
உடனடியாக அங்கிருக்கும், அந்தந்த மொழியில் இருக்கும் அறிவியல், நவீனத்துவ, விஞ்ஞான, கல்வி, மற்றும் சமகால நடப்பு, என தமிழர்களை முன்னேற்றத் தேவையான நூல்கள் எந்த மொழியில் இருந்தாலும் அவற்றை தமிழுக்கு மொழிமாற்றம் செய்யுங்கள்.
ஒன்றை புரிந்துகொள்ளவேண்டும் " மரபுகள் உடைக்கப்படும்போதுதான் புதியதொன்று உதயமாகின்றது" அதற்கேற்றால்ப்போல் தமிழுக்கும், தமிழர்களுக்குமான எனது காணிக்கை, நான் பிறந்த பலன் இது என எண்ணிக்கொண்டு மொழிபெயருங்கள்.
மரபுகள் உடைக்கப்படும்போது தான் புதியவைகள் உதயமாகின்றன என்பது உண்மைதான், அனால் உடைபடும் மரபுகள் எம் கலாசார அத்திவாரங்களை அசைத்துவிடாத அளவுக்கு மிகுந்த அவதானத்துடன் செயற்படுங்கள்.

உங்கள், மொழிமாற்றத்தகவல்கள், புத்த வடிவிலும், கணனி ஏற்றத்திலும் முன்னெடுக்கப்படட்டும். எங்கே என்ன புதிய அறிமகமோ அடுத்த சில நாட்களில் தமிழனுக்கு அவைகள் ஐயம் திரிபுற புரிந்துகொண்டு அவனும் அதை பரீட்சார்தித்துப்பார்க்க வகை செய்யுங்கள்.
மெல்ல தமிழ் இனிச்சாகும் என்று சொன்னவர்கள் எல்லோரும், தமிழை வாழ வைத்த உங்களைப்பார்த்து, உங்கள் பிரவாகங்களைக்கண்டு வாயடைத்து, தமிழும், தமிழனும் அழிக்கப்படமுடியாதவன் என புரிந்துகொள்ளட்டும்.
உங்களால் முடியாது என்று மட்டும் நினைத்துவிடாதீர்கள், நிச்சயம் முடியும். இமயம் ஏறி கொடிநட்டுத்திரும்பியவர்களையே, சறுக்கிவிழவைத்தவர்கள் நீங்கள் என்பதை மட்டும் மறந்தவிடாதீர்கள் ….
இனி …மெல்ல தமிழ் அச்சாகும்.
(மீள்பதிவு...)

Thursday, October 29, 2009

ஹோலிவூட்டை கலக்கப்போகும் “The Expendables”


ஹோலிவூட் திரைப்படங்களின் இரசிகரா நீங்கள்? அப்படி என்றால் அடுத்த ஆண்டு (2010) ஆகஸ்ட் மாதம் 20 ஆம் தேதிவரை நீங்கள் பற்களைக்கடித்துக்கொண்டிருந்து காத்திருக்கவே வேண்டும்.
ஏன் என்றால் உலக திரைப்பட பிரியர்களின் கனவுகளில் மட்டுமே நடக்கும் அதிசயம் ஹோலிவூட்டை கலக்கப்போகும் “The Expendables” திரைப்படம்மூலம் நிறைவேறப்போகின்றது.


ஹாலிவூட் அக்ஸன் திரைப்படங்களை இரசித்து பார்ப்பவர்களின் கனவு நாயகர்களாக ஆனோல்ட் சிவாஷினேகர், ஷில்வஸ்ரர் ஸ்ராலோன், ஜெட் லீ, ஆகியோர் மறக்கமுடியாத அக்ஸன் சிகரங்களாக உள்ளனர் என்பது எவரும் மறுக்கமுடியாத உண்மை ஆகும். இந்த நிலையில் இவர்கள் மூவரும் இணைந்து நடித்தால் அது இரசிகர்களுக்கு பெரு விருந்துதானே.
இந்த விருந்து போதாதென்று மேலும் ஹோலிவூட் முன்னணி நட்சத்திரங்களான மிக்கி ரொக்கி, ஜோன்ஸன் ஷதாம், டொல்ப் டன்ஹிரன், எரிக் ரொபேட்ஸ், ரெர்றி கிறியூஸ், ஸ்ரீவ் ஒஸ்ரின் ஆகியோரும் இணைந்து கலக்கினால் இரசிகர்களின் களிப்புக்கும், கொண்டாட்டத்திற்கும் அர்த்தம் இல்லையா என்ன?


அறுபதுகள் கடந்தும் இன்றும் உடல்வாகுவை முப்பதுகள் போலவே கட்டுக்கோப்பாக வைத்திருக்கும் ஷில்வஸ்ரர் ஸ்ராலோனே இந்த திரைப்படத்தை இயக்குவதும், தயாரிப்பதும் மேலும் ஒரு சிறப்பான விடயமாகும் என்பதுடன் இந்த திரைப்படத்தின் பிராதான பாத்தித்தில் அவரே நடித்தும் வருகின்றார்.
ஷில்வஸ்ரர் ஸ்ராலோன் தலைமையிலான அசைக்கமுடியாத கில்லாடி குழுவொன்று தென்னமெரிக்காவில் நடத்தும் ஒப்பரேசன் நடவடிக்கையினை மையமாக வைத்தே இந்த திரைப்படம் உருவாகி வருவதாக தெரிவிக்கப்பட்டுள்ளது.


இந்த திரைப்படத்தின் அந்த நடிகர்கள்குழுவானது ஒரு கனவு அணி எனவும், இதுபோல இந்த நூற்றாண்டில் திரைப்படங்கள் வந்ததில்லை என பல பத்திரிகைகள் இப்போதே “The Expendables” இன் புகழ்பாட ஆரம்பித்துள்ளன.
இந்த திரைப்படத்திற்காக நடிகர்களின் சம்பளங்கள், மிகப்பிரமாண்டமான காட்சிகள் என்பவற்றிற்காக பல மில்லியன் அமெரிக்க டொலர்கள் கொட்டப்படுவதாகவும் அறியமுடிகின்றது. இதேவேளை பல திரையரங்குகள் இந்த திரைப்பட படப்பிடிப்பு ஆரம்பிக்கப்பட்ட உடனேயே தங்கள் திரையரங்கங்களில் இந்த படத்தை வெளியிடுவதற்கு போட்டி போட்டுக்கொண்டதாகவும் பத்திரிகை செய்திகள் குறிப்பிட்டு காட்டுகின்றன.


இருந்தபோதிலும் ஷில்வஸ்ரர் மீண்டும் 80ஆம் ஆண்டுக்கால பாணியில் ஒரு திரைப்படத்தை எடுத்துவருவதாகவும், இதில் பல நடிகர்கள் உள்ளதாக விளம்பரப்படுத்தப்பட்டாலும், இங்கு சில்வஸ்டர் மற்றும் ஜோன்ஸன் ஷதாம் அகியோரின் ஆதிக்கமே அதிகமாக இருக்கும் எனவும், 80ஆம் ஆண்டுகால இரசனைகள் தற்போது முற்றிலுமாக மாறிவிட்டதை ஷில்வஸ்டர் மறந்துவிட்டார் எனவும் இது முற்றுமுழுதான பக்கா வசூலைக்குவிப்பதற்கான ஒரு திட்டமே எனவும் விமர்சித்துள்ள பத்திரிகைகளும் உண்டு.

இதேவேளை “The Expendables” என்ற தலைப்புடன். 1989ஆம் ஆண்டு ஒரு திரைப்படமும், 2000 ஆம் ஆண்டு ஒருதிரைப்படமும் வெளியாகியுள்ளன. எது எப்படி இருந்தாலும் இந்த “The Expendables” (2010) உலக மட்டத்தில் பாரியதொரு எதிர்பார்;பினை உருவாக்கியுள்ளது என்பது மறுக்கமுடியாத உண்மைமே.

பிரமிக்கவைக்கும் “The Expendables” திரைப்படத்தின் ஸ்ரில்கள் சில….












Wednesday, October 28, 2009

மேய்ந்துபெற்ற தமிழ் சிலேடைகள் சில...

தமிழ் மொழியின் அழகுகள் பல உண்டு. அதில் சொல்விளையாட்டும் ஒன்று.
தமிழின் சொல்லாட்சி நாவரப்பெற்றவர்கள் தமிழ் செய்யுள்களில் புகுந்துவிளையாடியிருப்பார்கள்.
கேட்பதற்கும் அவை தித்திப்பாக இருக்கும்.
இதில் சிலேடை செய்யுள்கள், என்றும் தெவிட்டாத சுவையுடையவையாக இருக்கும்.

அண்மைக்காலங்களாக தமிழ்த்திரைப்படங்களில் நகைச்சுவை நடிகர் பாஸ்கரன் அவர்கள் இவ்வாறான பல செய்யுள்களை திரைப்படங்களில் தெரிவித்துவருவதை அவதானித்துவருகின்றேன். கண்டிப்பாக அவர் தமிழை ஆழமாகக்கற்றவராகவோ அல்லது தமிழை நேசிப்பவராகவோ இருக்கவேண்டும்.
சரி..அங்கங்கே தமிழ்தேடி மேயும்போது நான் மேய்ந்து பெற்ற சில சுவையான தமிழ் செய்யுள்களை உங்களுக்கு தருகின்றன்.


மரமது மரத்தில் ஏறி
மரமதைத் தோளிற் சாய்த்து
மரமது மரத்தைக் கண்டு
மரத்தினால் மரத்தைக் குத்தி
மரமது வழியே சென்று
வளமனைக் கேகும் போது
மரமது கண்ட மாந்தர்
மரமொடு மரம் எடுத்தார் . . .

இந்தப்பாடலின் விளக்கம்
மரமது மரத்தில் ஏறி (அரசன்,குதிரை)
மரமதைத் தோளிற் சாய்த்து(வேல்)
மரமது மரத்தைக் கண்டு (அரசன் வேங்கை)
மரத்தினால் மரத்தைக் குத்தி(வேல், வேங்கை)
மரமது வழியே சென்று(அரசன்)
வளமனைக் கேகும் போது
மரமது கண்ட மாந்தர்(அரசன்)
மரமொடு மரம் எடுத்தார் . . .(ஆல், அத்தி)

பொருள் - ஒரு அரசனானவன் மரம் ஒன்றில் ஏறி, மரத்தில் நிலையெடுத்து நின்று, தனது ஆயுதமான வேலை தோழில் சார்த்தி, அந்தப்பகுதியால் வரும் புலியை கண்ணுற்று, அந்தப்புலியின் மேல் தனது வேலினால் குற்றி புலியை வீழ்த்தி, பின்னர் அந்த மரத்தை விட்டு இறங்கினான். இதை பாhத்திருந்த மக்கள், அவனுக்கு (அரசனுக்கு) ஆரத்தி எடுத்தனர்.
அதாவது குறிப்பிட்ட ஊர் ஒன்றில் காட்டில் வாழும்புலி ஒன்று கிராமத்தினுள் நுளைந்து பொதுமக்களுக்கு அச்சுறுத்தலாக இந்ததை அந்த ஊர் மக்கள் முறையிட்டதையடுத்து அங்கு வந்து அரசன் மேற்படி புலியை வதைத்தான் என்பதை நாம் விளங்கிக்கொளலாம்.
(இதைவேறுபலவிதமான கருத்துக்களில் கூறுபவர்களும் உண்டு)
000000000000000000000000000000000


அஞ்சிலே ஒன்று பெற்றான்; அஞ்சிலே ஒன்றைத் தாவி
அஞ்சிலே ஒன்றாக ஆரியர்க்காக ஏகி
அஞ்சிலே ஒன்று பெற்ற அணங்கு கண்டு அயலார் ஊரில்
அஞ்சிலே ஒன்றை வைத்தான்; அவன் எம்மை அளித்துக் காப்பான்
- கம்பா.
பால காண்டம் . ஆற்றுப் படலம் 10 வது பாடல்

இப்பாடலில் இடம்பெறும் “அஞ்சிலே" எனும் சொல் ஒரே மாதிரியாக, ஒரே உச்சரிப்பை கொடுத்த போதிலும், ஒவ்வொரு அடியிலும் அவை உணர்த்தும் பொருள் வௌ;வேறானவை.
முதல் வரியில் இடம்பெற்றுள்ள அஞ்சிலே என்னும் சொல் பஞ்ச பூதங்களில் ஒன்றான வாயுவிற்குப் பிறந்தவன் அனுமன் என்பதனைக் குறிக்கும்.
அஞ்சிலே ஒன்றைத் தாவி என்பது, பஞ்ச பூதங்களில் ஒன்றான தண்ணீரைத் (கடல்) தாண்டி அனுமன் இலங்கை சென்றான் என்று பொருள்படும்.
அஞ்சிலே ஒன்று ஆக ஆரியர்க்காக ஏகி- ஆகாய மார்க்கத்தில் இலங்கைக்குப் பறந்து,
அஞ்சிலே ஒன்று பெற்ற அணங்கைக் கண்டு -ஐந்தில் ஒன்றான பூமி தேவியின் மகளான சீதையை இலங்கையில் கண்டு என அர்த்தப்படுகிறது. (ஜனகர் தங்கக் கலப்பையால் யாக குண்டத்திற்காக பூமியைத் தோண்டும் போது தோன்றியவள் சீதை)
கடைசி வரியில் வரும் அஞ்சிலே ஒன்றை வைத்தான் அவன் எம்மை அளித்துக் காப்பான் - இலங்கைக்கு ஐந்து பூதங்களில் ஒன்றான நெருப்பையும் வைத்து எரித்தான் எனப்படுகிறது.
இப்பேற்பட்ட ராமபக்தனான அனுமன் நமக்கு வேண்டியன எல்லாம் தந்து - அளித்து காப்பான் என்பதே இந்த 4 வரி துதிப்பாடலின் பொருள்.
00000000000000000000000000000000

சிலேடை
ஒரே சொல்லைப் பல பொருள் கொள்ளும்படி தமிழ்ச் செய்யுளில் கையாளுவதைச் சிலேடை அணி என்று சிறப்பித்துச் சொல்வார்கள். இந்த 'அணி'யில் 'புகுந்து விளையாடிய' சிலேடை மன்னன் காளமேகப் புலவரைப் பற்றி எல்லோரும் கேள்விபட்டிருக்கிறோம். சுவையானதும் எளிதானதுமான அவரது பாடல்கள் பல உங்களில் பலருக்கு மனப்பாடமாகக் கூட ஆகியிருக்கும்! அவரும் பிற புலவர்களும் தங்களுடைய சிலேடைக் கவிதைகளை மிகவும் சாமர்த்தியமாக அமைத்திருப்பதைக் காணலாம். அப்பாடல்களில் காணும் சிலேடைச் சொற்கள் யாவும், ஒரு வகையில் பொருள் கொண்டால் ஒரு கருத்தையும் இன்னொரு வகையில் பொருள் கொண்டால் இன்னொரு கருத்தையும் வெளிப்படுத்தி இரண்டு முற்றிலும் மாறான குணங்களைக் கொண்ட ஆட்களையோ பொருள்களையோ குறிப்பிட்டு நம்மை வியக்க வைக்கும். காளமேகத்தின் சிலேடைப் பாடல் ஒன்றில் பாம்பையும் வாழைப்பழத்தையும் ஒப்பிட்டு 'முடிச்சுப் போடும்' நகைச் சுவையைக் காணலாம். வேறெந்த மொழியிலும் இத்தகைய கவிதைகள் இருப்பதாக (என் சிற்றறிவுக்குத்) தெரியவில்லை.

கவிதையில் மட்டுமல்லாமல் உரைநடை இலக்கியத்திலும் நடைமுறைப் பேச்சிலுங் கூடச் சிலேடை ஒரு தனி இடத்தைப் பிடித்துக் கொண்டிருக்கின்றது. 'நவீன காளமேகம்' என்று அழைக்கப்பட்ட தமிழ்ப் பேரறிஞர் (காலம் சென்ற) கி.வா. ஜகந்நாதன் சிலேடையைத் திறம்படப் பேச்சில் கலப்பதில் பெயர்பெற்றவர். கண்ணதாசன் போன்ற கவிஞர்களும் சிலேடைச் சுவையைத் தம் பாடல்கள் வழியே மக்களுக்குப் புகட்டியிருக்கிறார்கள். அவருடைய, "பார்த்தேன் சிரித்தேன்", "அத்திக்காய் காய் காய்" போன்ற பாடல்களைப் பலரும் இரசித்திருக்கிறார்கள்.

அந்தவகையில் நண்பர் ஆனந்த் எழுதியுள்ள புதிய சிலேடைகள்.
1. கணபதியும் கணினியும்

தட்டில் மெதுபண்டம் ஏற்பதால் தாரணியைச்
சட்டென்(று) எலியோடு சுற்றுவதால் - மட்டில்லாப்
பாரதத்தில் மேன்மையுற்றுப் பாரோர் வினைக்குதவும்
வாரண மாம்கணினி காண்.

இங்குள்ள பல சொற்கள் விநாயகருக்கும் கணினிக்கும் ஒருங்கே பொருந்துமாறு அமைக்கப்பட்டுள்ளன. முதலில், கணபதியைக் கூறும் விதத்தைப் பார்ப்போம்.
அவர், அன்பர்கள் தட்டில் படைக்கும் மிருதுவான கொழுக்கட்டைப் பண்டத்தை விரும்பி ஏற்பார்; தம் வாகனமான எலியில் (மூஞ்சூறு) ஏறி உலகெலாம் விரைவில் சுற்றுவார்; அளவிட இயலாத பெரிய நூலான மகாபாரதத்தை (வியாசர் சொல்லிவர, தாம் தம் கொம்பை எழுத்தாணியாகக் கொண்டு) எழுதிப் புகழ் பெற்றவர்; உலகத்தோர் வினைகள் இடையூறின்றி நடக்க உதவிபுரிபவர்

இப்போது பாடலைக் கணினியின் பெருமையைக் கூறுவதாகப் பார்த்தால் அது, குறுந்தகட்டில் உள்ள மென்பண்டத்தை (ளழகவ றயசந) ஏற்கும்; 'மவுஸ்' என்னும் எலிப் பொறியோடு இணையம் வழியாக உலகைச் சுற்றிவரும்; கணினித்துறையில் அளவிட இயலா ஆற்றலுடையவர்களைக் கொண்ட இந்தியாவில் அது மேல்நிலை எய்தும்; வீட்டிலும், அலுவலிலும் நாம் செய்யும் பணிகளுக்கு உதவும்.

2. சிற்றுந்தும் மேகமும்

மண்ணீர் குடித்திடும் மாந்தர் மனந்தோன்றும்
எண்ணங்கள் போல்விரைந் தோடிடும்- வண்ணங்கள்
பூணும் புழுதியுற வாரி யிறைத்திடும்
காணுமின் சிற்றுந்தாம் கார்.

சிற்றுந்து ('கார்'): மண்ணிலிருந்து எடுக்கப்படும் 'பெட்ரோலை'ப் பயன்படுத்தும்; மனிதர் மனத்திலெழும் விருப்பங்களுக்கேற்ப அவர்கள் நினைக்குமிடத்திற்கு விரைவில் கொண்டு சேர்க்கும் (அல்லது, மனிதரின் மனோ வேகத்திற்கொப்பான வேகத்துடன் ஓடும்); பல வண்ணங்களில் கிடைக்கும்; நம்மேல் புழுதி படியுமாறு அதை வாரி இறைத்துக்கொண்டு ஓடும்.

மேகம்: நிலத்தில் உள்ள நீரைச் சுமந்து இருக்கும்; மனிதர்களின் மனத்திலெழும் நினைவுகளைப் போல மாறி மாறி உருவங்களுடன் வானில் விரையும்; பல வண்ணங்களில் எழிலுடன் தோன்றும்; புழுதியைக் கிளப்பிக்கொண்டு விழும் மழை நீரைக் (வாரியைக்) கொட்டும்.

Tuesday, October 27, 2009

பொறுக்கி எடுத்த பொக்கிசங்கள்..

தலைவன்.

தமிழில் காப்பியங்கள் வாயிலாகவும் புலவர்களின் நாவன்மையினாலும் தலைவர்களுக்கான தமிழ் வரைபிலக்கணம் சிறப்பாக எழுதப்பட்டுள்ளது.
"அன்னியத்தலையெடுப்புக்களை, திணிப்புக்களை அடக்கியாளும் மதிநுட்பம், உடல் வலிமை உடையவனும் அஞ்சாத சக்தி கொண்டவனும், தனது மண்ணையும் மக்களையும் நசுக்க முற்படும் எதிரிகளை புறமுதுகிடச்செய்து விரட்டக்கூடிய போர்க்குணம் கொண்டவனும், தனது மொழி கலாசாரம், கலை ஆகியவற்றை தனது வீரத்திற்கொப்ப போற்றி வளர்ப்பவனும் "எல்லா வகையிலும் தங்களை பாதுகாக்கக் கூடியவன் என்ற நம்பிக்கையினை சகல தரப்பு மக்கள் மீதும் ஊட்டியவனே சிறந்த தலைவன் ஆனான்.
அவன் தவைன் என்றால் எப்படி இருக்கவேண்டும் என்ற கேள்விக்கே தன் இனிய செயல்களினால் இடம்விட்டு வைப்பதில்லை.

தமிழின் அரசு சின்னங்கள்.

தமிழரின் அரசு, அரசாங்கத்திற்குரிய சின்னங்களாக இருபது சின்னங்களை தமிழறிஞர்கள் மன்னர் காலத்திலேயே வரையறை செய்துள்ளனர். அவையாவன
முடி குடை ஆசனம் கவரி தோடி முரசு சக்கரம்
யானை கொடிமதில் தோரணம் பூரணநீர்க்குடம் பூமாலை
சங்கு கடல் மகரம் ஆமை இணைக்கயல் இடபம்
சிங்கம் தீபம் என்பனவாகும்.

மொழிக்கையாட்சி.

நவீனகால தமிழ் இலக்கியத்தில் மொழிக்கையாட்சி கைவரப்பெற்றவர்கள், பாரதி, அதன்பின்னர் பாரதிதாசன் அகியோரே. ஆனால் இவர்களின் பின்னர் தமிழ் மொழிக்கையாட்சி "அரசியல் அரங்குகளில்" எதிரொலிக்கத்தொடங்கின பேரறிஞர் அண்ணாத்துரையின் திருவாயிலிருந்து.

சுதந்திரப்போராட்ட காலங்களிலும் அதன்பின்னர் கொங்கிரஸ் ஆட்சிக்காலத்திலும் மேடைகளில் கோலூன்றித் தடுமாறிய தமிழ், அண்ணாத்துரை என்ற அறிஞர் அண்ணாவின் மேடையேற்றத்தின் பின்னர் தங்கு தடையின்று பிரவாகம் எடுத்து ஓடி மாற்றுக்கருத்துடையோரையும் மறைவாக நின்று கவனித்து கேட்கும்படி செய்தது.
தமிழில் மட்டும் இன்றி ஆங்கிலத்திலும் புலமை படைத்தவர் அறிஞர் அண்ணா. இக்காலத்தில்த்தான் அண்ணாவின் பேச்சுக்களில் அடுக்குச் சொல் அலங்காரம் (Alliteration) ஒப்பேற்றப்பட்டது.

நவீன தமிழில் கவித்துவத்தை விட்டு, மொழிக்கையாட்சி, மற்றும் கவிசார்ந்த பேச்சு ஆகியவை கொண்ட "மொழிக்கையாட்சியில்" பேரறிஞர் அண்ணாவே பிதாமகர் ஆவார்.
அண்ணா ஒலிபெருக்கியைத் தொட்டதன் பின்னர்தான் பிரசங்கம் என்ற பழமைவாதச்சொல் மாறி சொற்பொழிவு என்ற தூயதமிழ்ச்சொல் அரங்கேறியது.

தமிழ் சினிமாவில் மிகப்பழைய செய்திக்குறிப்புகள்.

* தமிழ் திரை உலகில் முதல் பேசும் படமாக " காளிதாஸ்" திரைப்படம் 31.08.1931 அன்று வெளிவந்தது. தியாகராஜபாகவதர் கதாநாயகனாக நடித்த இந்த படத்தை ஏச்.எம்.ரெட்டி அவர்கள் இயக்கியிருந்தார்.

* ஏச்.எம்.ரெட்டி இயக்கத்தில் 1936ஆம் ஆண்டு வெளிவந்து பெருவெற்றிபெற்ற திரைப்படம் " மாத்ரு பூமி" இதில் பி.யு.சின்னப்பா அவர்கள் கதாநாயகனாகவும் ரி.வி.குமுதினி அவர்கள் கதாநாயகியாகவும் நடித்திருந்தனர்.

* தமிழக திரைத்துறை வரலாற்றில் " நடிக மன்னன்" " தவநடிக பூபதி" ஆகிய பட்டங்களால் பி.யு.சின்னப்பா போற்றப்பட்டார்.

* 1939ஆம் ஆண்டு வெளியாகி சுயமரியாதை, சுதந்திர உணர்வு என்ற கொள்கைகளை சினிமா மூலம் பரப்பும் நடவடிக்கைக்கு வித்திட்ட திரைப்படம் கே.சுப்பிரமணியம் இயக்கி தயாரித்த "தியாக பூமி" ஆகும்.

* 1945 முதல் 1952 வரையான காலப்பகுதிக்குள் அறிஞர் அண்ணாத்துரையின் " வேலைக்காரி", " சொர்க்கவாசல்", "ஓர் இரவு" ஆகிய படங்களும் மு.கருணாநிதியின் "ராஜகுமாரி ", "அபிமன்யு ",
"மந்திரிகுமாரி ", "பராசக்தி" ஆகியபடங்களும் வெளியாகி பெரு வெற்றி பெற்றன.
அண்ணா, கருணாநிதி ஆகிய இருவரினதும் பேனாக்களின் முனைகளிலிருந்து இந்த ஏழு படங்களும் முதன்முதலாக தமிழ்திரைப்பட வயல்களில் அரசியல் விதைகளை தூவிவிட்டன.

அண்ணாவின் பதில்கள்.

இந்திய சுதந்திரத்தின் பின்னர் தமிழ்நாட்டை ஆண்டுவந்த கொங்கிரஸ் கட்சியினரிடமிருந்து ஆட்சியைக் கைப்பற்றி சுதேச கட்சியான அண்ணாத்துரை தலைமையிலான "திராவிட முன்னேற்றக் கழகம் " ஆட்சி அமைத்தது.
சுமார் 1,1/2 வருடங்ளே அண்ணா முதலமைச்சராக ஆட்சி செய்தாலும் இன்றும் போற்றப்படும் வகையில் அவர் ஆட்சியும், அவரது பேச்சுக்களும் இருந்தன.

தனது பேச்சுக்களால் தன்னவர்களை மட்டும் அல்ல, எதிர்க்கட்சிக்காரர்களையும் கட்டிப்போடும் வல்லமை உள்ளவர் அண்ணா. அவரது பதில்கள் மிகச்சுவையானதாகவும், ஆனால் கேட்பவரை காயப்படுத்தாதவையாகவும் நகைச்சுவையானதாகவுமே இருக்கும். உதாரணமாக ஒரு சம்பவம்.

தமிழகச் சட்டமன்றத்தில் அன்றைய பேச்சாளரும், முதுகலை பட்டதாhரியும், வழக்கறிஞருமாகிய தீவிர கொங்கிரஸ்காரர் கே.விநாயகம் ஒருநாள் சட்டமன்றத்தில் வாக்குவதத்தில் மிகக்கோபமாக ஒருநாள் அண்ணாவைப்பார்த்து,
Mr.Anna Your Days are counted! எனத்தெரிவித்தார்.
ஆதற்கு உடனடியாக பேரறிஞர் அண்ணா மிக நிதானமாக
Mr.Vinayagam… My Steps are measured! எனப்பதிலளித்தார்.
அதைக்கேட்டதும் கே.விநாயகம் வியப்பு கலந்த புன்னகையுடன் கோபம் பறந்துபோனது தெரியாமல் தனது இருக்கையில் அமர்ந்துகொண்டாராம்.

LinkWithin

Related Posts with Thumbnails